Шмит: Во БиХ мора да остане една заедничка армија

Очигледно постои недоразбирање меѓу некои политичари, особено во Република Српска, а Дејтонскиот договор бара да се водат конструктивни разговори, не само во Бања Лука, туку и во другите делови на земјата и работите постојано да се коригираат, изјави синоќа високиот претставник во БиХ, Кристијан Шмит.

Во новогодишната порака до граѓаните на БиХ, Шмит изјави за Н1 БХ дека не може да прифати да не се применуваат законите донесени од неговите претходници, дека мора да остане една заедничка армија, дека верува дека БиХ не е во опасност од војна, но дека била во опасност кога се работи за сиромаштија и напуштање на државата. Тој, исто така, истакна дека е благодарен на меѓународната заедница за успехот.

„Две, три армии, тоа не може да биде, се работи за Договорот за трансфер на надлежностите и тој мора да опстане, мора да остане една заедничка армија, а тоа се вооружените сили”, рече Шмит.

Високиот претставник објасни дека НАТО и ЕУФОР се присутни во БиХ поради стабилизација.

„Искрено, не сметам на некои баталјони што ќе дојдат, туку на стабилно присуство во некоја рамка”, рече Шмит.

Тој смета дека ситуацијата во БиХ не е добро позната на меѓународно ниво и нагласи дека се обидува тоа да го промени и дека и покрај тоа што некои имаат, како што рече, идеја дека ситуацијата сега во таа земја е како во 1990-те, тој не мисли дека БиХ е во опасност од војна.

„Постои опасност од нестабилност, но БиХ сама ја создава, таа не е донесена надвор од БиХ”, рече Шмит.