Градоначалникот Касами во посета на дежурните служби во Тетово

Градоначалникот на Тетово Биљал Касами во текот на новогодишната ноќ ги посети вработените во дежурните служби. Ги посети вработените во комуналното претријатие, полицијата и пожарната. Посетите ги започна со посета на вработен во ЈКП Тетово кој е на болничко лекување поради повреда при санација на дефектот на водоводната мрежа во месноста Лешница во текот на декември.

-Го посетив работникот Рахим, вработен во Јавно комунално претпријатие „Тетова“ – Тетово кој беше опериран. За среќа неговата здравствена состојба е стабилна. Секогаш ќе бидеме на страната на работниците бидејќи тие ја вршат најдобрата работа за нашиот град. Им благодариме на Рахим и неговите колеги што Тетово и понатаму има вода за пиење и чистота, порача Касами.

Тој ги посети полицајците и пожарникарите за кои потсети дека 365 дена беа и ќе бидат на услуга на граѓаните.

-Затоа, вечерва им благодарам на сите од тимот на Територијалната единица против пожарот предводена од командант Ука Алити за неуморната работа во служба на Тетово и тетовчани. Воедно им посакав среќна нова година со надеж дека ќе имаме помалку пожари и поплави, повеќе љубов и среќа, за град од соништата за сите, порача Касами.

Градоначалникот ги посети и полицајците во централното градско подрачје кои во текот на ноќта беа ангажирани на терен да се грижат за безбедноста на граѓаните.