Полска почнува да гради ограда на границата со Белорусија

Полската погранична стража денеска потпиша договори за изградба на заштитна ограда на границата со Белорусија, од каде минатата година речиси 40.000 мигранти се обидоа да влезат во Полска.

– Граничната стража денеска потпиша три големи договори за изградба на оградата, соопшти заменик министерот за внатрешни работи и администрација на Полска. Според него, заштитната ограда се очекува да биде завршена кон крајот на јуни.

Оградата ќе биде долга 186 километри, ќе се гради на четири локации истовремено, а ќе има 22 порти кои ќе овозможуваат минување на животни. Планирано е оградата да биде висока пет метри, а современата опрема ќе вклучува и дневни и ноќни камери за надзор и сензори за движење.