Продолжува традицијата за Водокрст и Водици во Тетово

По една година пауза поради пандемијата, годинава по повод православниот празник Богојавление Водици ќе се одржи чинот на спуштање на осветениот крст во тетовскиот соборен храм „Свети Кирил и Методиј“ како и во други цркви. Во Тетово се празнува и утрешниот ден Водокрст, ден пред Водици.

Минатата година поради пандемијата празникот се одбележа со празнична литургија и Богојавленски водосвет без одржување на традиционалното спуштање на осветениот крст во црковниот базен.

-ПРАЗНУВАЊЕТО ПОЧНУВА СО УТРЕНА ВО 7 ЧАСОТ И ЛИТУРГИЈА ВО 8 ЧАСОТ. ПО ЗАВРШУВАЊЕ НА ЛИТУРГИЈАТА И БОГОЈАВЛЕНСКИ ВОДОСВЕТ ЌЕ СЕ ИЗВРШИ ЧИНОТ НА СПУШТАЊЕ НА ОСВЕТЕНИОТ КРСТ ВО БАЗЕНОТ ПРИ СОБОРНАТА ЦРКВА „СВЕТИ КИРИЛ И МЕТОДИЈ“ ОКОЛУ 9.30 ЧАСОТ, ИНФОРМИРАШЕ ОТЕЦ МАРЈАН МАДЕВСКИ ОД ТЕТОВСКО-ГОСТИВАРСКАТА ЕПАРХИЈА.

Богојавленските празници во Тетово ќе почнат утре со одбележување на Водокрст, ден пред Водици во црквата „Света Богородица“. Таму, исто така, има утрена од 7 часот и литургија од 8 часот, по што ќе се одржи и Богојавелски водосвет и спуштање на осветен крст во водите од црковниот базен околу 9 часот.