Меѓуградските линии од и за Кичево целосно проодни за сите видови возила

По вчерашните интензивни врнежи од снег во кичевскиот регион, вработените од подружницата на „Македонија пат" Кичево презедоа целодневна акција за чистење на патиштата кон Скопје, Охрид, Битола и Прилеп.

Седум машини со колку што располага оваа подружница, беа вклучени во чистењето на снегот и одржување на проодноста на сите патни правци.

Покрај чистењето на снегот, на патиштата беа фрлени над 40 тони индустриска сол и околу 7 кубици ризла и песок за подобрување на абразивноста на подлогата.

-Од вчера изутрината откако во нашиот регион наврнаа поголеми количества на снег, нашите екипи се континуирано на терен и работат на одржување и расчистување на снегот на сите патни правци. Така, во овие часови проодни се патиштата кон Гостивар, Охрид, Битола и Прилеп и не само за патнички моторни возила и автобуси, туку и за тешки товарни возила, изјави Зоран Маркоски, раководител на Подружницата на „Македонија пат" Кичево.

Тој напомена дека и покрај тоа што нема нови врнежи од снег, патиштата мора да се одржуваат тековно бидејќи преостанатиот снег од подлогата се топи и во ноќните часови замрзнува и подлогата станува опасна за движење на моторни возила.

-Бидејќи топлото време и солта го стопија преостанатиот снег од подлогата, за да не дојде до замрзнување на коловозитево ноќните часови, континуирано посолуваме и попесочуваме и на тој начин придонесуваме да се стопи преостанатиот снег и да се намали лизгавоста на подлогата. Оваа операција ќе ја продолжиме и во наредните денови и ноќи се додека на коловозите има и најмали количества на снег и мраз, додаде Маркоски.