Албански прв полицаец задоволен од ефикасноста во сузбивањето на трговијата со дрога

Министерот за внатрешни работи, Бледи Чучи, реагираше по објавувањето на извештајот на Стејт департментот на САД во кој се наведува дека Албанија е локална база за меѓународни шверцери на дрога и реакциите на опозицајата дека „ САД ставиле печат на она на што таа обвинувала дека Албанија е магацин на силни дроги“.

Во објава на Твитер тој наведува дека зголемувањето на количината кокаин запленета од албанските власти во пристаништето Драч, во текот на 2021 година и учеството на државната полиција во заедничките меѓународни операции, се важни показатели кои ја докажуваат ефикасноста на работата на албанските структури и зголемената доверба во државната полиција.

-Зголемувањето на количеството запленет кокаин во текот на 2021 година во пристаништето Драч, благодарение на работата на државната полиција, е значаен показател за нашата ефикасност во борбата против криминалните групи во областа на наркотиците. Овој факт е потврден и во годишниот извештај на американскиот Стејт департмент за „стратегијата за контрола на меѓународната трговија со наркотици“, во кој се оценува и активното учество на Албанија во заедничките меѓународни операции за сузбивање на трговијата со дрога и заплена на нелегално стекнати средства, напиша Чучи.

Според него овие два значајни податоци докажуваат дека „ работата на државната полиција и довербата во оваа структура е подигната на повисоко ниво“.

-Остануваме посветени на продлабочување на резултатите преку размена на информации и други заеднички операции, наведува Чучи.