Прва изложба на штипскиот уметник Зоран Митревски

Штипјанецот Зоран Митревски денеска за првпат ги презентираше своите уметничка дела во библиотеката „Гоце Делчев“ во Штип. Станува збор за Осмомартовска ликовна изложба со наслов „Жената – вечна инспирација“.

Митревски, преку својата прва изложба ја искажа љубовта кон сликарството и се одлучи да ја посвети на жената како вечна инспирација. Според Митревски, основната порака е дека сликарството треба да се види, почувствува и доживее.

Ликовната изложба беше пропратена со читање поезија, односно со литературата, како сродна уметност на сликањето, а сликаа ученици од едно основно и едно средно училиште во Штип.

Промотор на изложбата беше м-р Гоце Ристовски, доцент на Факултетот за театарски уметности при Универзитетот за аудио-визуелни уметности – ЕСРА.