Објавен превод на данскиот роман „Болка во џебот“

Издавачката куќа „Антолог“ во рамките на својот проект „Храбри нови зборови прекрасни нови светови“ ја објави книгата „Болка во џебот“ од данската авторка Аста Оливија Норденхоф

– Во чест на денот на жената и борбата за правата на жената, а во склоп на акцијата „Силни женски гласови“, од печат излегува роман за слепата љубов, насилството и капитализмот. Базиран е на вистински настан – пожар на патнички траект во 1990 година, во кој загинаа 159 луѓе. Иако настанот е реален, ликовите се фиктивни. Романот е наречен „најамбициозен книжевен потфат за 2020 година“, соопшти „Антолог’.

Авторката Аста Оливија Норденхоф (1988) студирала на Данската академија за креативно пишување, каде што денес е професор. Досега објавила два романа и збирка поезија. Трите книги се наградени со престижни награди.

Романот „Болка во џебот“ ги добил наградите „Пер Улоф Енквист“ и Наградата за литература на Европската Унија за 2020 година. „Антолог“ информира дека е замислен како прва книга од септологијата наречена „Скандинавска ѕвезда“.

Преводот на „Болка во џебот“ од дански на македонски јазик е на Лара Крстева-Ичокаева, а автор на графичкото уредување е Марко Трпески. Книгата е објавена со поддршка на програмата „Креативна Европа“ на Европската Унија и на Министерството за култура.