Отвoрена самостојна изложба на графичарот Стефан Младеновски во Крива Паланка

Триесетина дела во графика од младиот кривопаланечки уметник од вечерва се изложени во галерискиот простор на Националниот Центар за култура Крива Паланка.

Изложбата „Графики и цртеж“ од академскиот графичар Стефан Младеновски е негова прва самостојна изложба во родниот град.

-Многу е големо задоволството што изложувам дела, првпат, во мојата Крива Паланка, особено бидејќи се дела од моето примарно занимање, графика и цртеж. Графиката, за разлика од другите уметнички стилови, сликарство и вајарство, е можеби помалку ценета и некако запоставена. Благодарност до Центарот за култура за поканата да се претатавам тука, изјави Младеновски.

Вања Јакимовска од НУЦК Крива Паланка рече дека иако е релативно млад, Младеновски досега има реализирно повеќе самостојни и голем број групни изложби, учесник е на повеќе ликовни колонии и работилници и е член на Друштвото на ликовни уметници од 2020 година.

Стефан Младеновски е роден 1996 година во Крива Паланка. Средно образование завршил во ДСУЛУД “Лазар Личеноски” – Скопје, оддел графика. Дипломирал на Факултетот за ликовни уметности – Скопје во 2020 година, оддел графика со насока конзервација и реставрација, во класата на проф. м-р Зоран Јакимовски. Апсолвент е на постдипломски студии на истиот факултет под менторство на проф. м-р Мирко Вујисиќ, катедра по графика.

Добитник е на студентската награда за графика “Драгутин Аврамовски – Гуте” и на Специјалната награда за развој на современата графичка уметност на 10-то Меѓународно графичко триенале во Битола.