Ќе се реконструираат пет железнички патни премини низ Велес

Низ Велес во тек на следниот месец ќе се реконструираат трите премини на железничките пруги на Нов мост, Стар мост и Дворови, додека пак во јули годинава се предвидени такви активности на останатите два – на премините на пругата кон село Горно Оризари и населбата Речани. Премините ќе се модернизираат со рециклирани гумени елементи, најавија денеска од Општина Велес.

Со ова, посочува општината, значително ќе се подобри сообраќајот во овие делови и ќе се намали амортизацијата на автомобилите, а граѓаните пешаци ќе можат да преминуваат преку овие премини посебно старите, изнемоштени и инвалидизирани лица и мајките со мали деца со колички.

Општинските власти укажуваат дека подобрувањето на инфраструктурата во Општината е неопходна и соопштуават дека на минатонеделниот состанок на градоначалникот Марко Колев со претставници од Македонски железници и инфраструктура и увидот на терен е договорено да почне реконструкција на пет железнички патни премини во и околу Велес.

Општина Велес со рециклирани гумени елементи во договор со Македонски железници лани целосно го обнови железничкиот премин на пругата Велес-Битола, кој поминува низ населбата Керамидна