Промоција на романот за деца „Мечето мери ум“ во Кочани

Во Центарот за култура „Бели мугри“ во Кочани со почеток од 12 часот ќе се одржи промоција на романот за деца „Мечето мери ум“ во издание на „Просветно дело“–Скопје.

Романот е пишуван во духот на романите во кои се бара во светот да завладеат разумот, срцето и вистината. Значи во приказната треба да се сообразиме со амбиентот од делата на просветителите, од делата чии содржини почиваат на авантуристичките и бунтовни природи на главните ликови. Содржината на романот е интимна исповед на мечето Мери Ум.

Родено во еден од кафезите за животни во циркусот „Ветрило“, кога ќе му се укаже прилика, за себе ќе каже дека е мече што знае да чита и пишува. Се разликува од другите мечки по умот и по тоа што го разбира јазикот на луѓето, како и на растенијата, животните, инсектите и птиците.Таквата обдареност му помага во решавањето на проблемите што му се исправаат на животниот пат.