Русија – Украина инвазија: НАСТАНИ во денот

Повеќе од 10 милиони Украинци ги напуштија своите домови од почетокот на војната, вклучително и повеќе од половина од детската популација во Украина, соопштија ОН.

Од нив, 6,5 милиони луѓе се раселени во Украина, а 3,9 милиони избегале во соседните земји, изјави заменик-координаторот на ОН за хуманитарни прашања Џојс Мсуја.

Американскиот претседател Џозеф Бајден изјави дека останува да се види дали Русија ќе преземе некаква акција за намалување на воените операции во Украина, додавајќи дека Вашингтон и неговите сојузници ќе продолжат со силни санкции и помош за Украина. – Ќе видиме дали ќе го спроведат она што повторно го предлагаат, им рече тој на новинарите во Белата куќа по состанокот со премиерот на Сингапур Ли Сиен Лунг.

Украинскиот претседател Володимир Зеленски ги коментираше денешните мировни преговори со Русија во Истанбул. Тој рече дека сигналите од преговорите може да се наречат позитивни, но „овие сигнали не ги намалуваат експлозиите на руските гранати“. Тој вели дека ќе верува само во конкретни резултати.

Високиот претставник на ЕУ за надворешна политика и безбедност Жозеп Борел, изјави дека Советодавната мисија на ЕУ во Украина (ЕУАМ) добила веродостојни информации дека просториите на нејзината теренска канцеларија во Мариупол неодамна биле погодени од руски гранати.

САД ќе мора да испратат повеќе постојани или ротирачки сили во Европа, изјави американскиот генерал и командант на врховната сојузничка команда на НАТО Тод Волтерс.

Лидерите на Велика Британија, Италија, Франција, Германија и САД во телефонски разговор ја повторија потребата да се поддржат руско-украинските разговори во обид да се воспостави примирје во Украина, соопшти прес-службата на италијанскиот премиер Марио Драги.

Условите за спроведување хуманитарна операција што Франција ја бара за да им се помогне на граѓаните во опколеното украинско пристаниште Мариупол „во оваа фаза не се исполнети“, соопшти кабинетот на францускиот претседател Емануел Макрон откако тој телефонски разговараше со неговиот руски колега Владимир Путин.

Макрон ја истакна мисијата што ја бара заедно со Турција и Грција од Путин, кој наведе дека „ќе размисли за тоа“ пред да одговори, рече претставник на Елисејската палата.

Русија соопшти дека значително ќе ја намали својата воена активност во северна Украина по „значајниот“ напредок на мировните преговори во Истанбул. Во потенцијално значајна промена повеќе од еден месец по почетокот на инвазијата, заменик-министерот за одбрана на Русија, Александар Фомин, рече дека Москва „радикално ќе ја намали воената активност во правец на Киев и Чернихив“.

Западните власти рекоа дека се „многу претпазливи“ во врска со руските дипломатски ветувања и стравуваат дека претседателот Владимир Путин би можел да се обиде да ја искористи ситуацијата.

Главниот преговарач на Москва во разговорите со Украина, Владимир Медински, рече дека ветувањето на Русија за „драстично намалување“ на воените операции не претставува прекин на огнот. Медински рече дека има уште „долг пат“ за да се постигне заеднички договор со Украина.

По објавата на Русија, двајца високи американски функционери рекоа дека САД рекоа дека гледаат Русија почнува да повлекува дел од своите сили од главниот град на Украина, Киев, што според нив е „голема“ промена во руската стратегија. Друг американски функционер рече дека секое движење на руските сили од околу Киев би претставувало „прераспоредување, а не повлекување“.

Украина повика на „меѓународен механизам за безбедносни гаранции“ сличен на членот 5 на НАТО, кој ги обврзува членките на алијансата да се бранат едни со други. Високиот украински претседателски советник, Михаило Подољак, рече дека гаранцијата ќе вклучи земји како што се САД, ОК, Турција, Франција и Германија „легално активно вклучени во заштитата на Украина од каква било агресија“.

Рускиот министер за одбрана Сергеј Шојгу рече дека „главната цел“ на Москва во Украина сега е „ослободување“ на регионот Донбас. Шојгу тврди дека „главните задачи од првата фаза од операцијата се завршени“.

Меѓународниот комитет на Црвениот крст ги повика Русија и Украина да постигнат јасен договор за безбедна евакуација на цивилите од опколениот град Мариупол и од другите места на фронтот, бидејќи виталните резерви се при крај.

Кремљ ги отфрли извештаите дека рускиот милијардер Роман Абрамович претрпел симптоми во согласност со труење за време на неформалната рунда разговори претходно овој месец. Портпаролот на Кремљ, Дмитриј Песков, рече дека извештаите се лажни и „дел од информативната војна“.