Штип одбележа 81 година од бомбардирањето на градот

Штип денеска одбележа 81 година од бомбардирањето на градот. Претседателот на Сојузот на борци – Штип, Петар Мицевски во пригоден говор се наврати на историјата и настаните, а градоначалникот, претставници од општината, политички партии и институции во Штип положија цвеќе пред спомен-релјефот кај Народниот театар во Штип.

-НА 6 АПРИЛ 1941 ГОДИНА БЕЗ ПРЕТХОДНО ОБЈАВУВАЊЕ НА ВОЈНА ГЕРМАНСКИОТ ФАШИСТИЧКИ ОКУПАТОР И НЕГОВИТЕ СОЈУЗНИЦИ ЕДНОВРЕМЕНО ОД ВОЗДУХ И КОПНО ЈА НАПАДНАЛЕ ТЕРИТОРИЈАТА НА БИВША ЈУГОСЛАВИЈА, А СО ТОА И НА МАКЕДОНИЈА СО ШТО ПРАКТИЧНО Е ОЗНАЧЕН ПОЧЕТОКОТ НА ОКУПАЦИЈАТА НА БИВША ЈУГОСЛАВИЈА И МАКЕДОНИЈА. ГЕРМАНСКОТО ВОЗДУХОПЛОВСТВО ГО ИЗВРШИ ВАРВАРСКОТО БОМБАРДИРАЊЕ НА ГРАДОТ ШТИП ОД БАЗАТА НА ЦАРСКА БУГАРИЈА БЕЗ НИКАКВО ПРЕДУПРЕДУВАЊЕ. ВО РАНИТЕ УТРИНСКИ ЧАСОВИ МЕСНОТО НАСЕЛЕНИЕ СÈ УШТЕ СПИЕШЕ, А НЕКОИ ОДЕЛЕ НА РАБОТА, РЕЧЕ МИЦЕВСКИ.

Градоначалникот на Општина Штип, Иван Јорданов посочи дека со денешното одбележување се дава почит на сите загинати коишто се жртви на бомбардирањето, но и на борците кои се избориле за денешната слобода. За 82. одбележување посака мир и слобода во целиот свет.

-НАША ОДГОВОРНОСТ КАКО ДЕНЕШНИ ГЕНЕРАЦИИ Е ДА РАБОТИМЕ ЗА РАЗВОЈ НА НАШИОТ ГРАД. АКО МИНАТИТЕ ГЕНЕРАЦИИ СЕ БОРЕЛЕ ЗА ДЕНЕШНАТА СЛОБОДА, НАША ОБВРСКА И ОДГОВОРНОСТ Е ДА ГО РАЗВИВАМЕ НАШИОТ ГРАД И ДА ЈА ТРАСИРАМЕ ИДНИНАТА НА ИДНИТЕ ГЕНЕРАЦИИ. НА ЖАЛОСТ ДЕНЕСКА ВО СВЕТОТ СЕ СЛУЧУВА НЕШТО СПРОТИВНО, ПОВТОРНО ОРУЖЈЕТО Е ИНСТРУМЕНТ ЗА ОДРЖУВАЊЕ НА ДОМИНАЦИЈА. ПОСАКУВАМ ДО ГОДИНА НА ОДБЕЛЕЖУВАЊЕТО НА 82 ГОДИНИ ОД БОМБАРДИРАЊЕТО НА ГРАДОТ ШТИП ДА ПРЕСТАНАТ СИТЕ ВОЈНИ ВО СВЕТОТ И ДА ЗАВЛАДЕЕ МИР, РЕЧЕ ЈОРДАНОВ.

Бомбардирањето на Штип почнало уште утрото, прво била бомбардирана тогашната Соколана, каде што сега е и Народниот театар-Штип, во која биле сместени две единици на тогашната Брегалничка дивизија на војската на Кралска Југославија. Од првиот напад загинале околу 150 војници и офицери, а многумина биле ранети. Веќе во вториот налет, половина час подоцна авионите ги бомбардирале тврдината „Исар“, околните маала и штипската Болница. Загинале 54 граѓани, 22 биле ранети, а десетмина се воделе за исчезнати.