Претставата „Чекајќи го министерот“ изведена во Кичево

Во театарската сала од Центарот за култура во Кичево синоќа беше прикажана комедијата на Семир Гигиќ „Чекајќи го министерот“. Првпат по подолг период салата беше исполнета до последното место, а присутните гледачи уживаа во комедијата во која играат актери Лидија Вукичевиќ, Сашо Ристоски и Семир Гигиќ.

Вукичевиќ беше презадоволна од посетеноста на претставата и од односот на публиката.

-Првпат настапувам пред кичевската публика. Најпрво да кажам дека сум воодушевена од вашето големо гостопримство. Имате убав Дом на културата, а публиката присутна на претставата беше прекрасна и ни даваше дополнителен адреналин за да одиграме најдобро што можеме.Пријатно сме изненадена од односот на гледачите кои и на овој начин потврдија дека имаат голема театарска култура, независно од големината на градот, публика која знае да гледа, да слуша и да награди, изјави по завршувањето на претставата српска актерка Лидија Вукичевиќ.

Присутните гледачи беа задоволни од претставата и сите посочија дека на градот му е потребен театар.

Од Центарот за култура има најави дека на почетокот на мај во Кичево ќе има гостувања и на други театарски групи од земјава.