Во Прилеп отворена традиционална изложба на фотографии

Околу 60 автори со исто толку фотографии учествуваат на традиционалната годишна изложба која синоќа беше отворена во ликовниот салон на прилепскиот центар за култура „Марко Цепенков“. Организатор на изложбата е Фото кино клубот „Прилеп“.

Во клубот има околу 200 членови од кои 80-тина работат активно и е единствениот во државава кој работи со млади.

Претседателот на клубот Сашо Попоски вели дека се надева и очекува сѐ повеќе млади во иднина да се одлучат за овие технички науки како и за видео и за кино техниката.

– Факт е дека прилепскиот Фото-кино клуб е меѓу најактивните во земјава и редок кој работи со млади. Младите се креативни, но им треба поттик и водство од искусните. Изложбата го пренесува нивниот талент и љубовта кон уметничката фотографија, им дава шанса на сите млади луѓе да ја покажат својата креативност и правилно да го насочат својот талент, истакна Попоски.

Прилепскиот градоначалник Борче Јовчески изрази подготвеност да им се помага на младите таленти.

-Ќе продолжиме да помагаме на Фото кино клубот и ќе бидиме значајна поддршка во идните планови и проекти, со цел заедно да допринесеме во афирмација на сите а особено на младите фотографи од нашиот град, посочи Јовчески

На изложбата присуствуваше и сопругата на Јордан Јорданоски-Зазо, зашто оваа традиционална изложба е посветена на прерано починатиот истакнат прилепски фотограф.

Идната година ќе биде јубилејна изложба, а од Клубот се надеваат дека ќе ја одбележат со најголем број фотографии.