Јавен повик за проверување на способностите за спортски вештини на учениците заинтересирани за Спортска академија

Спортската академија почнува потрага по спортски таленти во земјава кои ќе бидат дел од ДСУ Спортска академија, во паралелки за фудбал, ракомет, кошарка и тенис за учебната 2022/2023 година. Министерството за образование и наука објави повик за проверување на способностите за спортски вештини на учениците заинтересирани за запишување во Спортска академија.

Покрај во Скопје, паралелки се предвидени и во состав на јавни средни училишта кои се надвор од седиштето на Спортската академија: фудбал и ракомет во „Кузман Шапкарев” – Битола; кошарка во „Перо Наков“ – Куманово и во „Ѓорче Петров“ – Кавадарци и паралелки за фудбал во „Ванчо Питошевски“ – Охрид; „Мирче Ацев“ – Прилеп; „Никола Карев” – Струмица; „Кирил Пејчиновиќ“ – Тетово; „Кочо Рацин“ – Велес; „Гостивар“ – Гостивар и „Коле Нехтенин” – Штип.

Учениците – спортски таленти во Спортската академија се оспособуваат да постигнуваат врвни спортски резултати и да се подготвуваат од рана возраст да станат членови на националните спортски селекции за фудбал, ракомет, кошарка и тенис. За таа цел учениците ќе имат специјално креирана програма за образование и тренинг и со нив ќе работат стручни тимови составени од тренер и негов заменик и физиотерапевт.

Како што е наведено во јавниот повик, кандидатите за упис во прва година ќе бидат селектирани од стручна комисија. Селекцијата ќе се одвива во фази: скаутирање од стручни лица, селекција од стручен тим и тестирање на психофизичките способности од страна на стручна комисија.

Во јавниот повик е објавена листа на локации и датуми на кои ќе се врши првичната селекција од конкретната спортска федерација за паралалките за ракомет, кошарка, тенис и фудбал.

– На учениците кои ќе бидат примени, а кои не се од регионот каде што ќе ја посетуваат наставата, ќе им биде обезбедено сместување и храна, а превоз до училиштето и до спортските терени ќе биде обезбеден за сите ученици, во согласност со закон, се наведува во јавниот повик.