Објавена детската книга „Товилиште за пеперутки“ од Марчин Шчигелски

Во издание на „Бата прес“ излезе од печат книгата за деца „Товилиштето за пеперутки“ од познатиот полски писател Марчин Шчигелски и илустраторката Магда Вошик. Делото од полски на македонски јазик го преведе Звонко Димовски. Делото е објавено со поддршка на Секторот за евроинтеграции на

Министерството за култура и програмата Креативна Европа на Европската Унија. Ова е уште една од десетте книги од десет различни европски јазици што „Бата прес“ ги објавува во минатата и оваа година во рамките на проектот „Отворени книги – отворени граници“. Првата промоција книгата ќе ја има на Саемот на книгата во Скопје од 3 до 9 мај.

„Што да прави Маја кога со денови и месеци врне снег? Варшава е прекриена со снег речиси до првиот кат на зградите. Во нејзиното училиште нема настава. Таа може да седи дома со родителите и со малата Алис и да зјапа во телевизорот. Но, таа оди на село и го истражува мистериозното исчезнување на Нина!

Во оваа книга пак ќе се сретнете со добрите пријатели од првата книга „Волшебницата од долниот кат“ од истиот автор: Маја, Бабуле, Монтерова, Марек и Мачорот што зборува. Но, нема да откриеме сè! Само ќе кажеме дека Маја ќе падне во центарот на стогодишната војна на пеперутките, ќе ги запознае царицата, царот.... и ќе ја води револуцијата.

Ќе биде страшно, забавно и интересно...“, соопштува издавачот во најавата за делото.

Авторот Марчин Шчигелски е роден во 1972 година во Варшава. Тој еден од најпопуларните современи полски писатели за деца и возрасни. Добитник е на бројни награди за детски книги.

Неговите книги се објавуваат и во Германија, Украина, Македонија, Србија, а две од нив, „Зад сините врати“ и „Арка на времето“ се лауреати на престижни полски и германски награди за детска книжевност. Во неговата богата кариера има напишано дваесеттина книги од кои десет се романи за деца, а покрај романите исто така пишува драмски сценарија и публицистички книги. Претходно работел како новинар и графички дизајнер.

Авторката на илустрациите Магда Вошик е доцент на Одделот за графички дизајн на Академијата за ликовни уметности во Вроцлав. Била илустратор, дизајнер и уредник во дневни весници, а соработува и со издавачки куќи и списанија за деца.