Драмска претстава „Ако останеш дома“ вечер во Центарот за култура во Кичево

Во Центарот за култура во Кичево вечер ќе се одржи драмската претстава „Ако останеш дома“. Претставата првпат се одржа на 9 декември но само пред мал број вработени од Центарот, а како што соопшти директорот на Центарот за култура Мазлам Османи, станува збор за современа Унгарска драма во еден чин.

-Иако драмата е напишана во минатиот век, таа ги отсликува проблемите на еден брачен пар кои се актуелни и ден денес, но се претставени на еден поинаков,современ начин. Оваа драмска претстава ја подготвувавме околу месец и половина и сметаме дека првата отворена претстава на овој драмски текст, ќе ги задоволи присутните гледачи во салата од Центарот за култура, истакна режисерот на претставата и главен актер Михајло Петрески.

Тој нагласи дека оваа драмска претстава е пријавена и за учество на Драмскиот аматерски фестивал, што традиционално кон крајот на мај се одржува во Кочани.

Во оваа драмска претава, покрај Михајло Петрески како носител на една од двете главни улоги, е и Виолета Петкоска. Сценографијата ја изработија вработените од Центарот за култура, костимите и декорирањето на сцената се дело на Александра Петреска. Изборот на музика и видео ги направи Матео Петрески.

Почетокот на претставата е во 19 часот.