„Волкот и трите прасиња“ – нова премиера на кумановскиот театар

„Волкот и трите прасиња“, е новата детска претстава на кумановскиот театар, која премиерно ќе биде изведена утревечер со почеток во 18:00 часот во Центарот за култура „Трајко Прокопиев“, најавија на денешната прес-конференција од установата. Претставата е работена според истоимената приказна, во режија на Бојана Краљевска, а играат Марко Трајковиќ, Нина Максимова, Александра Михајловска и Владанка Крстевски.

Актерите ги повикаа најмладите и родителите да ја видат претставата која преку игри, песни испраќа пораки до најмалите.

-Преку претставата испраќаме две пораки до најмладите. Првата дека пријателството е богатство без разлика на различноста, големината. Втората е дека работата секогаш се исплаќа. Двете помали прасенца не го слушаат братчето и на потежок начин ја учат оваа лекција. Приказната има среќен крај, ги учи помалите дека треба да бидат послушни, вели режисерката Краљевска.

Билетите за премиерата веќе се распродадени, првата реприза ќе се игра во понеделник со почеток во 18 часот во Центарот за културата, бидејќи театарот сè уште се реконструира.