Излезе од печат историскиот роман „Се викам црвена“ од Орхан Памук

Историскиот роман „Се викам црвена“ од турскиот писател Орхан Памук деновиве излезе од печат на македонски јазик во издание на „Арс Либрис“, дел од „Арс Ламина – публикации“.

Ова е петто дело од Памук публикувано во едицијата „Современи класици“ на „Арс Ламина“, по „Истанбул: Сеќавањата и градот“, „Белата тврдина“, „Нов живот“ и „Жената со црвена коса“.

Орхан Памук е познат современ турски писател, добитник на Нобеловата награда за литература во 2006 година. Неговите дела се занимаваат со соочувањата меѓу Истокот и Западот, со проблемите на уметноста и на идентитетот, а честопати се споредувани со оние на Џојс, Набоков и Маркес.

Романот „Се викам црвена“ нè носи во XVI век, директно во јадрото на религиските и политички интриги на Отоманската Империја. Самиот поделен меѓу двете традиции, Орхан Памук уште еднаш ја демонстрира својата калеидоскопска визија, во која вешто се поставени Истокот и Западот, единката и општеството, религијата и уметноста.