Анастисиадес ја осуди Турција затоа што не се приклучи на европските санкции кон Русија

Кипарскиот претседател Никос Анастасиадес денеска ја осуди одлуката на Турција да не се приклучи на европските санкции кон Русија поради нејзината инвазија на Украина.

-Трите земји поврзани со Европската унија мора да ја усогласат својата надворешна и безбедносна политика со Европа, рече Анастасијадес на прес-конференција со хрватскиот премиер Андреј Пленковиќ, кој се наоѓа во официјална посета на пваа островска држава.

„Меѓу другото, мислам на Турција. Нејзината одлука да не ги почитува европските санкции е за осуда“, рече кипарскиот претседател, нагласувајќи дека Анкара го намалува влијанието на мерките.

Турција дели поморска граница со Русија и Украина во Црно Море и одржува добри односи со двете земји.

Таа ја нарече руската инвазија неприфатлива и повика на итен прекин на огнот, но не воведе санкции кон Русија.

Анастасиадес, ветеран на кипарската и европската политика, кажа дека е јасно дека санкциите ќе бидат на штета на европската економија, но дека негативното влијание не треба да биде поголемо отколку врз руската економија.

-Затоа санкциите мора да имаат цел, рече тој.

Кипарскиот претседател рече дека Европа не смее да го изгуби од вид проблемот на Кипар и окупацијата на северот на островот, што е „исто така европски проблем“.