ТУИ со наполу помалa загуба во однос на лани

Европскиот туристички оператор ТУИ денеска објави дека првите три месеци од оваа година завршиле со речиси наполу помала загуба во однос на лани и прогнозира позитивни резултати за целата 2022 година, истакнувајќи ги резервациите за летни одмори.

Во второто фискално тримесечје, кое заврши во март, ТУИ има првична загуба (пред каматите и даноците) од 330 милиони евра. Во истиот период лани загубата изнесувала 633 милиони евра. А, приходот е зголемен деветпати, на 2,13 милијарди евра, бидејќи луѓето продолжуваат со патувањата по олеснувањата околу епидемиолошките ограничувања.

– Првиот знак беа солидната работа за време на велигденските празници. Високата побарувачка за патувања и добрите деловни резултати ги потврдуваат нашите прогнози. Оваа 2022 година ќе биде добра – со многу патувања летово, изјави извршниот директор на ТУИ, Фриц Јусен.

Капацитетите на ТУИ годинава ќе се приближат до нивото од пред кризата во 2019 година, смета тој.