„Поштарот“ премиерно на сцената во штипскиот Дом на млади

Штипската публика вечер ќе може да ужива во ново театарско остварување во Домот на млади каде тричлената актерска екипа Благоја Чоревски, Марија Кондовска и Игор Ѓеорѓиев ќе ја донесе на сцената драмата „Поштарот“ од писателот Трајче Кацаров.

-Приказната е семејна и таа зборува за аленацијата, за брачната отуѓеност. Зборува за тоа колку се познаваме иако со децении делиме иста брачна постела. Виновен за тоа е тајниот живот, живот кој можеби го живееме под диктат на неостварените соништа, вели Кацаров.

Кацаров го цитира филозофот Карл Јесперс кој запишал: „Каде има тајна нешто не е токму“.

-Има ли нешто што не е токму во животот на поштарот? Тоа е прашање за неговата жена и за дојденецот. А по се изгледа дека е и за поштарот, посочува Кацаров.

Актерот Чоревски истакна дека секогаш ги поддржува македонските автори, а процесот за оваа претстава бил убав и за паметење.

-Претставата говори за едно патријахално семејство кое живее убаво, се сакаат и мажот и жената имаат два сина, значи имаат прекрасен брак. Тој работи како поштар, жената му била на разбојот на машината во текстилната фабрика и поштарот доаѓа точно на денот кога се пензионира. И доаѓа еден човек кој им растура скоро сѐ, вели Чоревски.

Актерската екипа истакна дека претставата ја подготвувале во Скопје, а премиерно ќе ја играаат токму на сцената на Дом на млади во Штип.

Претставата финансиски е помогната преку Програмата на Министерството за култура. Ќе се игра во 20 часот во Дом на млади-Штип, а влезницата е 100 денари.