Кирил Петков разговараше со шефот на азербејџанската дипломатија Џејхун Бајрамов

Бугарскиот премиер, Кирил Петков, во зградата на Владата го прими министерот за надворешни работи на Азербејџан, Џејхун Бајрамов, јави дописникот на МИА од Софија.

Петков и Бајрамов ја истакнаа многу добрата соработка во областа на енергетиката меѓу Софија и Баку.

Бугарскиот премиер нагласи дека наскоро се очекува пуштање во употреба на интерконекторот меѓу Бугарија и Грција преку кој неговата земја ќе ја добие целата договорена количина на азербејџански гас. Тој истакна дека тоа ќе биде од голема корист за бугарските потрошувачи и за енергетската безбедност на Бугарија и на целиот балкански регион.

Бугарскиот премиер и шефот на азербејџанската дипломатија изјавија дека имаат одлична стратешка соработка во секоја област и ветија дека ќе работат заедно на проширување на партнерството во сите области меѓу Софија и Баку.