АД ЕСМ: Работна средба со КФВ банка за нови инвестиции во обновливи извори

Идните инвестиции на АД ЕСМ во обновливи извори на електрична енергија беа во фокусот на средбата меѓу раководството на компанијата и високи претставници на германската државна развојна банка КфВ.

Како што информираат во денешното соопштение од АД ЕСМ, банката која поддржува проекти од енергетската транзиција, е заинтересирана да понуди нови поволни кредитни линии за АД ЕСМ, пред се, за изградба на фотонапонски електрани во РЕК Битола, но и на други локации во рамките на подружниците низ државата.

-Токму со кредит од КфВ е веќе изградена првата фотонапонска електрана во целосна сопственост на државата, односно на АД ЕСМ, ФЕ Осломеј-1 во Кичево, а вчера се потпиша договор за нов заем за ревитализација на шесте големи хидроелектрани: Вруток, Врбен, Равен,Тиквеш, Шпилје и Глобочица, велат од АД ЕСМ.

Оттаму додаваат дека со поволни кредитни линии од КфВ финансирани се двете фази од изградбата на ветерниот парк Богданци, како и изградбата на Топлификација за Битола, Новаци и Могила.