Палестинските власти не се согласуваат со планот на Трамп за раселување на жителите на Газа

Палестинските власти категорично го отфрлија предлогот на американскиот претседател Доналд Трамп за преселување на жителите на Појасот Газа, јави ДПА.

-Палестинското раководство зазема цврст став дека решението со две држави, засновано на постоење на две држави и доследно на меѓународното право, е гаранција за безбедност, стабилност и мир, напиша денеска на „Х“, Хусеин ал-Шеик, генерален секретар на Извршниот комитет на Организацијата за ослободување на Палестина.

Решението за две држави предвидува право да коегзистираат две посебни независни држави - израелската и палестинската.

-Палестинското раководство „ги отфрла сите повици за раселување на Палестинците од нивните татковини, додаде Шеик. „Тука сме родени, овде живеевме и тука ќе останеме“, нагласи тој.

По средбата со израелскиот премиер Бенјамин Нетанјаху во Белата куќа, Трамп вчера изјави дека „САД ќе ја преземат контролата врз Појасот Газа“ и дека околу два милиони Палестинци треба да бидат раселени во други земји.

Присилното раселување на Палестинците би било спротивно на меѓународното хуманитарно право, забележува ДПА.