Поранешен шеф во ЦИА: САД и дадоа на Украина доволно оружје да „крвари“, но не и да победи

Поранешниот шеф на операции на ЦИА за Европа и Евроазија, Ралф Гоф, изјави дека САД, од страв од можна нуклеарна војна, и обезбедиле на Украина доволно оружје само за да издржи и да им нанесе загуби на руските трупи, но не и да ја победи Русија.

Гоф, кој поминал три децении во ЦИА, верува дека од почетокот на војната во Украина, САД и нивните сојузници усвоиле стратегија што и дозволила на Украина да „се бори и да крвари“, но не и да победи, бидејќи се плашеле дека Русија, под претседателот Владимир Путин, би можела да употреби нуклеарно оружје ако е на работ на пораз.

„Доколку ја опремевме Украина со вистинското оружје на почетокот, можеби ќе можеа да ги протераат Русите од земјата. Сепак, тоа не се случи и беа поставени темелите за оваа долготрајна, исцрпувачка воена ситуација што ја гледаме денес“, рече Гоф во интервју за „Њујорк тајмс“.

Тој посочи дека поранешниот американски претседател Џо Бајден и неговите сојузници му дозволиле на Путин да го „диктира“ текот на конфликтот и не успеале да и обезбедат на Украина потребно оружје во клучните моменти, а сето тоа од страв од нуклеарна ескалација.

„Тие не и дадоа на Украина доволно за победа, туку само доволно за борба“, рече Гоф.