Отворени се сите гласачки места на кои Граѓанската асоцијација МОСТ има распоредено свои набљудувачи и тие немаат проблеми при набљудување на процесот. Отворањето на гласачките места помина без регистрирани проблеми. Гласачкиот материјал е доставен на сите гласачки места, а уредувањето на гласачките места е на начин што ја запазува тајноста на гласањето.

Сите 81 гласачко место во општините Гевгелија, Богданци, Дојран и Валандово се отворени точно на време, во 7 часот утрово кога почна референдумското изјаснување на граѓаните кое според информациите од општинските изборни комисии се одвиваат во мирна атмосфера и без никакви проблеми.

Според првичните податоци од Општинската изборна комисија од 7 до 9 часот во Општина Штип гласале 1.412 гласачи или во проценти своето право на глас го искористиле 3,4 отсто од вкупниот број на избирачи.

Во општина Ресен до 9 часот референдумското право го оствариле 679 гласачи од 16.760 регистрирани во Избирачкиот список.

Во општина Дебар до девет часот правото на глас го оствариле 196 лица, од вкупно запишани 18.318 или 1,1 отсто.

Избирачките места за референдумот се отворени утрово во седум часот и секаде гласањето тече без прекин, информираат од Државната изборна комисија.

Почна гласањето на 77 избирачки места во Општина Штип, каде што со право на глас се вкупно 41.854 гласачи.

Без проблем започна гласањето во четирите општини од Тиквешијата. Во Кавадарци се гласа на 59 избирачки места, а во единствениот избирачки список се запишани 32.217 лица со право на глас. Претседателот на Општинска изборна комисија, Зоран Костов потсети дека вчера гласаа 19 немоќни лица.

Трите гласачки места во општина Вевчани се отворени утрово во 7 часот, потврди за МИА претседателката на Општинската изборна комисија Параскева Гогоска - Кукоска.

Изјаснувањето на граѓаните по однос референдумот во општините Охрид и Дебрца се одвива непречено и во демократска атмосфера, на сите гласачки места.