- Гласачкото место 5025 беше отворено на време, во седум часот и затворено во 19 часот. Од 24 запишани гласачи, вкупно гласаа 17 македонски државјани. Гласањето течеше непречено и без никакви проблеми, изјави претседателот на изборниот одбор во ДКП Белград, Александар Поповски.

Мирно и без проблеми заврши гласањето во Атина, а гласачкото место број 5014 во Канцеларијата за врски на Република Македонија беше затворено во 19 часот по локално време.

Според Елмира Бакали претседателка на општинската изборна комизија, за гласање се пријавени 27, одобрено е гласање на 23, а гласале 22 болни изнемоштени лица.

Претседателот на Државната изборна комисија (ДИК) Оливер Деркоски во интервју за МИА истакна дека Комисијата е подготвена за утрешниот референдум и се надева на успешен ден бидејќи, како што вели, досега нема никакви елементи или сознанија што би воделе кон спротивното.

Атакот врз гласачите во Мелбурн, постиран и споделуван на социјалните мрежи претставува шокантно, грдо и грубо кршење на изборниот молк и притисок врз гласачите, оценува ЦИВИЛ.

Во поширокиот гостиварски регион започна референдумското изјаснување со гласањето на 13 болни и изнемоштени лица кои претходно беа пријавени во ОИК Гостивар. Во општините Врапчиште и Маврово-Ростуше немаше пријавни за денешното гласање.

Гласањето на македонските граѓани во Белград, Србија, се одвива непречено, без никакви проблеми. До 12 часот излезеноста е една третина од вкупниот број запишани граѓани во посебниот извод на избирачкиот список во Амбасадата на Република Македонија.

Секое сликање или снимање на гласачи при остварување на нивното право, како и какво било попречување на гласањето и процесот на спроведување на референдумот не се дозволиви согласно на закон, соопшти Комисијата за следење евентуални противправности сторени при организирањето и спроведувањето на референдумот при Јавното обвинителство на РМ.

Инцидентите забележани пред едно од гласачките места во странство ја нарушуваат слободата на граѓаните да го искористат своето право на глас, оцени денеска Граѓанската асоцијација МОСТ.

Мирно и непречено се одвива гласањето во Канцеларијата за врски на Република Македонија во Атина, каде што се пријавени 15 лица, а правото на глас до 15 часот го остварија 80 отсто од гласачите.