Од вас зависи, одлуката е на граѓаните, референдумот е историска шанса за земјата, која не се појавува секој ден, поддршка за успех на плебисцитарното изразување на граѓаните. Ова се дел од пораките што изминатите денови на интензивирани дипломатски активности ја пренесуваат претставниците на меѓународната заедница, кои ја посетија Македонија во пресрет на престојниот референдум.

Ова е историски момент кој е поголем од секој од нас, од нашите партии или кавги или лични интереси. Да ги оставиме различните убедувања и интереси за момент зад нас и да ја видиме светлината на Европа која не повикува, порача вечерва премиерот Зоран Заев на централната прослава по повод Денот на независноста и повика секој граѓанин да гласа на референдумот за да донесе одлука за, како што рече, нашата втора независност.

Да се обединиме и да се направи сé и да ја извојуваме најголемата битка за Македонија на 30 септември со која ќе ѝ обезбедиме иднина и развој и да покажеме дека сме силни вредности, со оваа порака зборови потпретседателот на Владата и министер за внатрешни работи Оливер Спасовски ја побара поддршката од гостиварци на вечерашната граѓанска трибина.

Демократската Партија на Албанците синоќа одржа седница на централното претседателство во проширен состав заедно со претседателите на ограноците на партијата. На седницата се одлучи да се формира централен партиски штаб за претстојниот референдум кој ќе се одржи на 30 септември.

Љубчо Георгиевски, Гојко Јаковлески, Димитар Димитров, Љубе Бошковски, Горан Рафајловскли, Ѓулистана Марковска, Љупчо Балковски, денеска преку писмо до јавноста ги повикаа граѓаните на Македонија да излезат на референдумот на 30 септември и да гласаат „ЗА“ .

Со свој став, денеска и се огласи навивачката група Комити, кои повикаа на бојкот на престојниот референдум.

Политичката партија Левица ги повика гостиварци да го бојкотираат претстојниот референдум со образложение дека тоа е единствениот механизам за спротиставување на власта и нејзините напори за интеграција на Македонија во НАТО сојузот.

Лидерот на Демократската унија за интеграција Али Ахмети денеска имаше средба со норвешкиот амбасадор Арно Санес Бјорнстад на која ја нагласи високата подготвеност на сите структури на ДУИ за успешен референдум.

Денес е денот кога го славиме осамостојувањето на Македонија, со референдумот од 1991 кога нашите татковци и дедовци, нашите повозрасни роднини и пријатели храбро се одважија и избраа иднина за нашата држава. Независна суверена и демократска Република Македонија.

Реално, прашањето е пре-емотивно и нема разбирачка. Дури и тие малкумина што се демек (или би требало да бидат) поинформирани и би биле спремни да донесат рационална одлука, се заслепени и не можат да ги видат аргументите на другата страна. И јас се гледам во нив, слепците, пишува Мисев.