Општина Гевгелија надмина излезност од 62 отсто на запишаните гласачи кои до 19 часот, во мирен избирачки ден го дадоа својот глас на вонредните парламентарни избори. Од ОИК Гевгелија соопштија дека на 37 избирачки места гласале 11.897 граѓани.

Во општините Ресен и Демир Хисар изборите се во тек, а граѓаните без проблеми и безбедно го остваруваат правото на глас и избор.

До 19:00 часот во општините Тетово и Јегуновце се надминати 40 проценти на излезност за гласање од страна на граѓаните. Во Општина Тетово од 84.454 граѓаните гласале 40,97 проценти додека во Јегуновце од 10.168 луѓе гласале 40,52 отсто запишани избирачи.

Од 79.945 граѓани со право на глас во Општина Гостивар, до 19 часот гласачкото право го оствариле 28.355 односно 35,47 проценти. Тоа претставува најголем одѕив од трите општини во Гостиварско.

На денешните вонредни парламентарни избори во Битола до 19 часот гласале 52 отсто од вкупно 81.488 регистрирани лица со право на глас.

До 19 часот на гласање излегле 830.370 граѓани со право на глас односно одѕивот е 45,77 проценти, објави вечерва Државната изборна комисија. Обработени се податоци од 3.463 гласачки места.

Во пелагониските општини Могила и Новаци, кои територијално припаѓаат на Изборната Единица-4, изборниот процес се одвива непречено и без забелешки.

На предвремените парламентарни избори до 19 часот во Охрид на гласање излегле 49,34 отсто од лицата со право на глас.

Пропусти при пристапноста на гласачките места и гласањето за лицата со попреченост, како и непочитување на протоколите за заштита од КОВИД-19, забележале набљудувачите на Здружението „Инклузива“.

Според досегашните потврдени информации од набљудувачите на МОСТ, на гласачките места имаат забележано неправилност на гласачкото место 0755 во село Осој, Општина Кичево, при што еден гласач го фотографирал гласачкото ливче и го ставил во гласачката кутија.