Програмата „Инкубатор“ за развој на младинската културна сцена, која ја организира Културниот центар „Интерарт“, објавува нов отворен повик за аудиции на млади уметници. Тие ќе бидат дел од новата продукција на Скопје танцовиот театар на „Танц фест 2019“ во три категории – современ танц, музика и визуелни уметности.

„Среде пустинската убост“ е насловот на песната посветена на монашкото секојдневие во манастирот „Свети Јован Крстител“ или познат како Бигорски.

На 37. Филмски фестивал во Бергамо „Bergamo Film Meeting“ од 9 до 17 март ќе биде организирана ретроспектива на комплетното творештво на режисерот, кинематографер, сценарист и монтажер Карпо Година, роден во Скопје во 1943 година. Фестивалот во Бергамо ќе го чествува Година како една од најрепрезентативните фигури на т.н. црн бран во југословенската и словенечката кинематографија.

„Прличев – сценски приказ на поетовата судбина“ е насловено драмското дело од академик Витомир Митевски во издание на „Матица македонска“.

Селекција од поезијата на Митко Гогов, концептуален уметник, поет и граѓански активист од Струмица е објавена во превод на шпански јазик на порталот „Vallejo & Co“, кој важи за еден од најдобрите портали за поезија во светот за сите оние од шпанско говорно подрачје.

На барање на публиката, Македонската филхармонија вечер од 19 часот повторно ќе го изведе концертот за деца и за возрасни „Со Дизни низ светот“.

Во рамки на ревијата на македонски филмови „Златна рамка“ денеска ќе бидат презентирани можностите кои за аудиовизуелниот сектор ги нуди „Медија“ – потпрограмата на „Креативна Европа“ на ЕУ, а утре ќе се одржи тркалезна маса „Нема успешна кинематографија без филмска критика“. Двата настана се од 11.30 часот во фоајето на кино „Фросина“.

Друштвото на филмски работници (ДФРМ) денеска ги соопшти добитниците на наградата „Златна рамка“ за филмски актер, филмски автор и филмски работник за 2019 година. Наградени се актерот Петар Мирчевски, Жаклина Крстевска – филмски костимограф и Петар Богоевски – легендарен филмски работник, осветлител. Церемонијата на доделување награди ќе се одржи утревечер во Клуб ресторанот на Младинскиот културен центар (МКЦ).

По светската премиера во официјалната селекција на Берлинскиот филмски фестивал на 10 февруари, новиот филм на Теона Стругар-Митевска „Господ постои, името ѝ е Петрунија“ македонската премиера ќе ја има на 15 март во кино „Милениум“.

Младата кореографка Адријана Данчевска, која е дел од уметничкиот тим на Скопје танцовиот театар, во Ротердам ја подготвува кратката кореографија „Скеч“.