Центарот за нови иницијативи во уметноста и културата „Локомотива“ во рамки на проектот „Што е кореографија?“ на дводневен настан во Кино Култура ќе претстави две нови современи танцови продукции – „Dream State“ на кореографот Валентино Апостоловски, и „Moonlight“ во кореографија на Александар Георгиев и Дарио Барето Дамас од Шпанија.

Во Македонската опера и балет вечер ќе биде изведена операта „Травијата“ во режија на Верена Штојбер од Германија, која премиерно беше прикажана на минатогодишните Мајски оперски вечери.

Издавачката куќа „Бегемот“ во новата едиција „Атлас“, во која ќе објавува најзначајни дела од светската книжевност, објави превод на романот „Со оган и со меч“ на нобеловецот Хенрик Шенкевич.

Со предавањето „Помеѓу политиките на задолжување и неофашистичкиот бран во светот“ на Маурицио Лазарато, италијански социолог, филозоф и активист кој живее и работи во Париз, во Музејот на современа уметност е отворен третиот Меѓународен фестивал за критичка култура-КРИК организиран од „Контрапункт“, кој во три дела ќе се одржува до 19 декември.

Во рамки на проектот на УСАИД за меѓуетничка интеграција на младите во образованието денеска во Струмица ќе биде одржан мултимедијален музички и танцов настап „Традиционално модерни“.

Во Чифте амам вечер од 19 часот ќе бидат отворени ретроспективна изложба „50 години Светска галерија на карикатури (1969-2019)” и изложба на 270 селектирани меѓународни уметници од Остен Биеналето на цртеж „Скопје 2018“.

Во галеријата на КИЦ на Република Македонија во Софија денеска ќе биде отворена изложбата „Мал формат“ на Друштвото на ликовните уметници на Македонија.

Со музичко-поетскиот перформанс „Поетска сина ноќ“, вечер во Радовиш почнуваат 45. Караманови средби. На манифестацијата со врвни уметнички дела и креации ќе учествуваат триесетина уметници и поети, членови на ДПМ и гости од пет балкански земји.

Триото „Опера“ во состав: Татијана Петрушевска Караскаковска – обоа, Игор Бакревски – кларинет, Марјан Милошевски – фагот, вечер, во рамки на манифестацијата „Есенски музички свенечености“, концертно ќе го промовира компакт дискот „Звукот на трските“.

Во Националната и универзитетска библиотека „Св. Климент Охридски“ денеска напладне ќе бидат одбележани 90 години од раѓањето на писателот Неџати Зекирија (1928-1988) – поет, раскажувач, писател за деца, преведувач од турската националност во Македонија.