Владата на Република Македонија и одобри на општина Гевгелија 60,7 милиони денари за плаќање на стари долгови кон доверителите. Основните буџетски приходи на општината за наредната 2019 година, наместо планираните 215 милиони денари, сега ќе изнесуваат 275,6 милиони денари.

Нов мост на реката Пчиња на регионалниот пат Петровец – Свети Николе ќе биде изграден во следните 15 месеци. За него ќе бидат инвестирани 950 илјади евра обезбедени од буџетот на јавното претпријатие за државни патишта.

Во Росоман почнаа обуките за користење сопствени ресурси за развој на туризам и бизниси во рамки на проектот „Еногастрономски пат низ Тиквешијата” што го спроведува Фондацијата „Тиквешки вински пат” со поддршка на Министерството за економија.

Едно лице го загубило животот, три се здобиле со тешки и 41 лице завршило со полесни телесни повреди, додека во 29 несреќи била причинета само материјална штета во вкупно 61 сообраќајна несреќа што во текот на ноември се случиле на поширокото тетовско подрачје, информираа од СВР Тетово.

Централната манифестација во рамки на чествувањата по повод патрониот празник на Охрид, 8 Декември – Денот на Св. Климент Охридски ќе се одржи вечерва со почеток во 20 часот во хотелот „Инекс Горица“.

По долгата и топла есен, метеоролозите за наредниот период најавуваат пад на температурите, постудено време, снег на повисоките места и „конечно“ вистински почеток на зимата. Иако сончевото време на сите возачи им оди во прилог, не треба да се заборави фактот дека во зима снегот и мразот се главни „учесници“ во сообраќајот на патиштата, а возачите треба да се прилагодат на нив и на условите за возење кои ги создаваат.

Магистралниот пат од Качаник до Генерал Јанковиќ, односно до граничниот премин Блаце меѓу Косово и Македонија денеска и утре ќе биде затворен за сообраќај поради градежни активности на автопатот „Арбен Џафери“ што ги поврзува Приштина и Скопје, јавува дописникот на МИА од Приштина.

Температури под нулата изутринава има во цела Македонија, а најниските се измерени во Берово -10 степени и во Скопје минус осум.

Работилница насловена „Климатските промени-реалност или илузија“ ќе се одржи денеска во Музејот на илузии во Скопје во соработка со Програмата за развој на Обединетите Нации (УНДП). На работилницата ќе се обрати заменик-министерот за животна средина просторно планирање Јани Макрадули.

Проектот Клиничка болница во Штип и натаму е заглавен. Не се работи ништо, а нема ниту информации кога и како ќе продолжи изведбата. Градежните активности се стопирани откако компанијата Бетон од Штип која е и подизведувач на проектот се соочува со финансиски проблеми, но и е дел од истрагата Империја на СЈО.