„Илинденскиот марш 2018“ денеска ќе стартува во 17 часот од паркот „Јане Сандански“ во општина Аеродром, која традиционално е покровител на овој коњички марш. Ќе заврши на втори август во Крушево, каде коњаниците треба да се приклучат на прославата на најголемиот македонски национален празник – Илинден.

Секторот за даноци и такси од општина Куманово ги доставува годишните решенија за данок на имот и на физичките и правните лица, соопштија денеска одговорните од секторот. Доставувањето на решенијата за правните лица е веќе завршено.

Дваесет основци од Кавадарци утре заминуваат на бесплатен летен камп во одморалиштето Михајлово. Шеста година по ред општинскиот Совет за превенција од малолетничко престапништво на град Кавадарци организира ваква награда за ученици со понизок економски статус на нивните семејства.

Прилепската локална самоуправа апелира до стопанските субјекти во општината што поскоро да ги внесат своите податоци во анкетните листови (енергетска картичка и топлински трансформации), поставени на веб-страницата на општината. Тоа се анкетни листови кои стопанствениците треба да ги пополнат за да се утврди трасата во проектот „Гасификација на Прилеп“.

Со пораки за поддршка на иницијативата за згрижување на деца без родителска грижа во семејство и пригодна културно-уметничка програма, гостиварската локална самоуправа и официјално се вклучи во кампањата „На секое дете му треба семејство".

Квалитетот на зрната кај житните култури годинава во поширокиот кумановски регион е со послаб квалитет во однос на претходните години поради честите врнежи од дожд во текот на летово, информираа денеска надлежните од подрачната единица на Министерството за земјоделство, водостопанство и шумарство Куманово.

Нивото на водата во акумулациите од хидросистемот „Брегалница“ се одржува на стабилно ниво, со што целосно ќе се исполни планот за наводнување за оваа сезона.

Помор на поголема количина риби е забалежан вчера во водите на Брегалница во близина на Делчево.

Непријатната миризба која веќе подолго време се шири низ Гевгелија во вечерните и раните утрински часови, предизвика големо незадоволство кај револтираните граѓани кои бараат од надлежните органи под итно да се најде и санкционира нивниот причинител.

Кога има земјотреси, особено кога се појаки, како што беше во Скопје во 2016-та (5.3) и серијата во Охрид минатата година (најсилниот 5.0), одговорите се бараат од Сеизмолошката опсерваторија.