Од Црвениот крст информираат дека се отворени и наменски телефонски линии за прва психолошка помош на броевите 071/338-081 во Кочани, 074/203-030 во Штип и 072/271-048 во Скопје кои ќе бидат во функција 24/7.

Агенцијата за аудио и аудиовизуелни медиумски услуги (АВМУ) им укажува на медиумите дека треба да го усогласат своето работење со деновите на жалост што ги прогласи Владата поради трагедијата во Кочани.

Во пожарот во Кочани загинаа петмина граѓани на Штип меѓу кои три деца и двајца возрасни. Меѓу загинатите е и директорот на Центарот за култура „Ацо Шопов“, Филип Стевановски.

Македонскиот сојуз во Шведска изразува изразува најдлабоко сочувство до семејствата на загинатите во трагедијата во Кочани и им посакува побрзо закрепнување на повредените.

Со неизмерна тага и длабока болка, Еврејската заедница во Р. Македонија и Фондот на холокаустот на Евреите од Македонија изразуваат најдлабоко и искрено сочувство до семејствата на загинатите и до сите погодени од оваа ужасна трагедија.

Оваа трагедија, за жал, се нагасува, е „уште едно потсетување дека во нашето општество честопати владее недостиг на одговорност и совест“.

Националниот совет за родова рамноправност соопшти дека по последните настани и страшната загуба на младите животи во трагедијата во ноќниот клуб во Кочани, нуди бесплатни услуги за консултација во бесплатното советувалиште, како и на бесплатната мобилна СОС линија, достапна 24/7 од сите фиксни и мобилни оператори – 141700.

Советот на Општина Кочани одржа вонредна седница по трагичниот пожар во дискотеката „Пулс". По едноминутната почит кон загинатите, претседателот на Советот Лазо Митев информираше дека прогласува седумдневна жалост во општината.

Министерството за социјална политика, демографија и млади соопшти дека во соработка со Меѓуопштинските центри за социјална работа во Кочани и Штип, веднаш презема мерки за поддршка на семејствата погодени од трагедијата што се случи рано утрово во кочанската дискотека.

Апелираат до сите новинари и медиуми доследно да ги почитуваат етичките принципи од Кодексот на новинарите и другите професионални стандарди, притоа внимавајќи на почитување на личната болка на семејствата на загинатите и повредените лица.