Во првите шест месеци од 2018 година автобусите на Јавното сообраќајно претпријатие „Скопје“ превезле 22,6 милиони патници. Најголемиот дел од нив се возеле во март, а најмалку во јануари. На градските улици секојдневно сообраќале 277 возила на ЈСП „Скопје“, а 206 на приватните превозници.

Ваучери за новородено дете денеска им беа доделени на 84 семејства кои живеат во општина Кисела Вода. Тие добија еднократна парична помош во висина од 6.000 денари.

Активисти од граѓанската иницијатива „Го сакам Водно“, велат дека се за гасовод во Скопје, но не на Водно.

Жичницата на Водно на иницијатива на граѓани на 28 месецов (вторник) кога е неработен ден поради верскиот празник „Голема Богородица“ ќе работи со вообичаено работно време иако е последен вторник во месецот кога се врши редовен сервис на објектот. Редовниот сервис ќе се изврши на 29 август (среда) и тогаш Жичницата нема да работи.

Добро е што Владата има разбирање и разговара со зелените активисти во обид да се намалат штетите од гасоводот кој минува низ Водно, но вистинско решение е да се смени трасата, вели претседателката на ДОМ Лилјана Поповска коментирајќи ја владината одлука да се измени делумно трасата на гасоводот кој поминува низ парк-шумата Водно.

По повод одбележувањето на 77- годишнината од формирањето на Првиот скопски партизански одред, делегација на Град Скопје предводена од претседателката на Советот Љубица Јанчева и советниците Анжелика Апчевска и Александар Трајановски денеска положи цвеќе.

Државниот инсекторат за животна средина по добиените дојави и информации за испуштање на емисии во воздух во општина Гази Баба изврши неколку вонредни инспекциски надзори при што не констатира загадување.

Во Гази Баба за жал има компании кои можеби во процесот на производство прават некоја грешка која инцидентно емитува чад или нешто друго, но континуирано загадување во овој момент нема, појасни денеска заменик министерот за животна средина и просторно планирање Јани Макрадули.

- Ако Владата и Градот Скопје одделија средства за пошумување на Парк шумата Водно и ние тврдиме и гарантираме дека тоа ќе се случи. Мислам дека сме направиле се за да продолжи изградбата на гасоводот на Водно.

Изградба на подземна сообраќајница во центарот на Скопје почнува денеска и поради тоа воведен е привремен сообраќаен режим на булеварот „Македонија“ (зад Музејот на Град Скопје и ТЦ „Рамстор“), кој ќе трае во наредните шест години, сменета е трасата на линијата „9“ и дислоцирана и една автобуска постојка.