Манчевски-Габриел: Единството на регионот важно за интеграција во ЕУ

Дигиталниот самит за државите од Западен Балкан, што како дел од Берлинскиот процес се организира првпат, беше темата за која денеска во Софија разговараа министерот за информатичко општество и администрација Дамјан Манчевски и еврокомесарката Мариа Габриел.

- Македонија е првата земја домаќин на Самитот што ќе се одржи на 18-ти и 19-ти април во Скопје. Еврокомесарката Габриел ја прифати поканата да го отвори самитот, како потврда дека дигиталната агенда е во фокусот на претседателството на Бугарија со Европската унија, соопшти Министерството за информатичко општество и администрација.

Министерот Манчевски, кој е во работна посета на Софија, истакнал дека поддршката на Европската комисија за Македонија во реализација на проектите во дигиталната сфера, како што се младинската гаранција, технолошкиот парк и националниот портал за е-услуги се од особено значење за нас.

Тој се осврнал на пораката што Дигиталниот самит треба да ја испрати, а тоа е важноста од единството на регионот во интеграцијата во Европската унија.

Еврокомесарката Габриел ги презентирала заложбите и конкретните мерки за драстично намалување на цените на роамингот во регионот.

Ова, како што се наведува, ќе биде една од пораките и на Дигиталниот самит затоа што е од важност за сите граѓани од регионот.

- Со реализација на мерки и активности во дигиталната сфера, граѓаните во регионот многу побрзо ќе бидат дел од Европското семејство, заклучиле министерот Манчевски и еврокомесарката Габриел.