Се гради нова училишна зграда во Казандол

Со финансиски средства обезбедени од турската владина агенција за развој ТИКА во валандовското село Казандол се гради нов објект на Подрачното основно училиште “Цветан Димов”. Градбата е почната пред 20-ина дена и стигната е до фаза на поставување кровна конструкција.

Од општина Валандово изразуваат здоволство од текот на работите и надеж дека со вакво градежно темпо ќе се запазат ветените рокови дваесетината ученици од почетокот на новата училишна година настава да следат во нова зграда која ќе им овозможи современи и безбедни услови за вршење на образовниот процес и рамноправност во инклузивноста на децата од турската етничка припадност.

Вредноста на објектот е предвидена на повеќе од 4 милиони денари, што заеднички го градат ТИКА и општина Валандово која на објектот треба да обезбеди електрични, водоводни и канализациски приклучоци и уредување на дворната површина.