Ване од Бегниште на четири години стана џоломар

Ване Лазаров од кавадаречкото село Бегниште, на четиригодишна возраст, синоќа прв пат беше маскиран во џоломар. Беше најмлад џоломар на василичарското празнување кое трае и денес.

Со тоа како што изјави за МИА неговиот чичко Орданчо Лазаров, младиот бегништанец ја продолжува повеќевековната селска традиција на маскирање за Василица.

– Многу ми е убаво, рече младиот Ване, додека од семејството појаснија дека и неговиот татко се уште се маскира, а дедо му е во моментов најстариот џоломар кој со џоломарската група, ја претставува традицијата на Бегниште по домашни и странски карневали.

– Сите делови од опремата му се интересни и сака сите да ги има на него, нагласи чичкото.

Џоломарската група е составена од повеќемина мажи. Тие се облечени со кожувчиња и имаат грпки, маскирани се со долги бради и мустаќи, исцрнети се со саѓи по лицата. На половините им висат клопотарци, со нив и со стапови прават огромна врева и ги бркаат лошите духови. Прават место за добрината. Во групата има и мажи преправени во невеста и баба, тие ја симболизираат новата година и плодноста, како и мудроста.