По два дена седница, пред гласањето Џафери информираше дека пратеник бил позитивен на Ковид, гласал под посебни услови

Иако собраниската седница за избор на нова влада траеше цели два дена, непосредно пред нејзино гласање, претседателот на парламентот Талат Џафери истакна дека еден од пратениците е позитивен на Ковид-19 и за него е обезбедена посебна просторија за гласање според посебен протокол.

„Една информација, според протколот за гласање, еден од пратениците од мнозинството ќе гласа од посебен простор во кабина на горниот кат, пратеникот е внатре според протоколот за заштита од ширење на ковид-19 и нема потреба од паника. Повторувам, преземени се сите мерки и нема простор за паника“, појасни Џафери пред гласањето за новата влада.

Останува нејасно според кои протоколи или одредби во деловникот е спроведено вакво гласање на пратеник, особено што се работи за избор на нова влада која речиси едвај и да има мнозинство.