Во Прилеп е отворена изложба на Симонида Филипова Китановска

Изложбата „Приказни од дворот“ со дела од уметничката Симонида Филипова Китановска беше отворена денеска во ликовната галерија од Центарот за култура „Марко Цепенков“.

На прилепската публика Филипова Китановска и претставува 40 свои дела, акварели.

Иако некои дела се инспирирани од патувањата на уметничката во Индија и Бразил, таа преку своите дела со мотиви на цвеќиња и од природата, порачува дека потребата да се патува во тропската прашума и да сме во потрага по егзотични хоризонти не е неопходна и сето тоа може да се види во еден обичен, скромен двор.

– Тоа е сè уште подеднакво инспиративно за уметниците денес, како што беше за импресионистите во деветнаесеттиот век, а тоа, веројатно, ќе продолжи да биде така, освен ако не ја уништиме природата. Можеби тоа е новиот концепт – уметноста како алатка за зачувување на животната средина за идните генерации, истакна Китановска.

Делата го привлекуваат вниманието на сите и се како мало спокојство.