Николоски: И пратениците на СДСМ се срамат да му легализираат корупциски скандал на Заев, втор по големина во историјата на Македонија

По 21 час расправа заврши маратонската седница за Предлогот на Закон за решавање на спорот помеѓу Владата на Република Македонија и Макпетрол АД Скопје по пат на спогодба со кој се предвидува да му се признае на Макпетрол сопственост на 50 отсто од гасоводот во земјата и да му се исплати цена од 33 милиони евра, седница која пратениците на ВМРО-ДПМНЕ со филибастеринг се обидоа да ја одолговлечат со цел спречување на носење на овој закон и како што велат тие легализирање на криминал кој треба да го потпише премиерот Зоран Заев.

Меѓу последните дискутанти беше и потпретседателот на ВМРО-ДПМНЕ Александар Николоски, кој истакна дека обидот на премиерот Зоран Заев вината да ја префрли на Собранието и пратениците преку добивање на овластување во вид на Закон нема да го спречи од кривична одговорност.

- Како е возможно номиналната вредност да изнесува 18 милиони евра а државата да плати 33 милиони евра на приватна компанија, во услови кога Државниот правобранител дал негативно мислење за предложената спогодба, праша Николоски.

Тој додаде и дека доколку пратениците од владеачкото мнозинство го поддржат овој закон не значи дека премиерот Заев ќе биде амнестиран од кривична одговорност.

- Од демократија на дело видовме како премиерот Заев не одвои ниту еден час да дојде во Собранието и да дебатира со пратениците на опозицијата. Тоа што колегите од СДСМ не се присутни во салата кажува дека и самите се свесни која е целта и намерата на Заев. Да му легализираат очигледен криминал односно после ОКТА втор најголем корупциски скандал во историјата на Република Македонија. Но, и ако го направат тоа, не значи дека ќе го амнестираат од одговорност, истакна Николоски.