МНР потврди дека Бучковски ќе оди во Софија, не споменуваат дека ќе разговара за Анекс туку за Акциски план

Министерот за надворешни работи Бујар Османи оваа недела оствари комуникација со министерката за надворешни работи на Република Бугарија, Екатерина Захариева каде беше договорено претстојните денови да се разменат предлози од двете страни за Акцискиот план, соопшти Министерството за надворешни работи.

Како што наведуваат во соопштението улогата на специјалниот претставник Бучковски е редовно да патува за Бугарија со цел следење на Акциониот план и поттикнување на соработката на линиските министерства.

-Во оваа насока очекувано е во наредниот период да оствари чести патувања на релација Скопје – Софија, додаваат од Министерството за надворешни работи.

Инаку, соопштението на МНР доаѓа откако во медиумите се појави информација дека владиниот претставник Владо Бучковски ќе патува во Софија, Каракачанов објави дека е подготвен Анекс со 12 точки а вчера во интервју за МИА, вицепремиерот за евроинтеграции Никола Димитров, порача дека разговорите со Софија до завршувањето на изборите добро е да бидат во мирување.