Нишани се придружи на оние кои бараат оставка од Баша

По поразот на неделните парламентарни избори, зачестија барањата за оставка на лидерот на опозициската Демократска партија, Љуљзим Баша.

Меѓу оние кои тоа го побараа е и Бујар Нишани, висок партиски функционер и поранешен претседател, кој директно го обвинува за личен неуспех во изминатите осум години.

-Изборниот резултат беше големо разочарување и очај за гласачите и поддржувачите на опозицијата, како и неискористена можност за долгоочекуваната промена. Корумпираната влада на Еди Рама ќе продолжи да ја држи власта повторно, по осум години скандали и неуспеси. Денеска е моментот Демократската партија да се ослободи од примерот на неспособност и моделот што ја уништува малку по малку, обвинува Нишани.

Додава дека Баша ја држи Демократската партија како заложник идентично како што Еди Рама ја држи во заложништво Албанија.

-Баша мора да преземе одговорност за неговиот личен осумгодишен неуспех. Еди Рама ја држи Албанија во заложништво а Љуљзим Баша Демократската партија. Демократската партија не е лична сопственост на еден човек. Таа е куќа на слободата на стотици илјади Албанци. Никој нема да може да ја земе таа хипотека од која било причина, во каква било форма и по секоја цена, порачува тој.

Нишани смета дека сега е вистински момент партијата да се „ослободи од неспособноста“ и завршува со изреката на Доналд Трамп „MakePDGreatAgain“.

Наспроти барањата на неговите сопартијци за оставка, Баша синоќа од пред партиското седиште обвини за изборен масакр и најави продолжување на битката до победа.

Баша на чело на Демократската партија дојде во 2013 година по поразот на демократите и повлекувањето од лидерската функција на Сали Бериша.