Одобрен проект за санација на фасадата на градскиот музеј во Крива Паланка

Со средства во износ од околу 1.6 милиони денари од Бирото за регионален развој на Министерството за локална самоуправа ќе се изврши санација на дотраената и оштетена фасада на Локалната установа Градски музеј Крива Паланка.

Проектот за санација на установата ќе го реализираат ЛУ Градски музеј и Општина Крива Паланка, истиот е насловен „Модерен музеј – европски град“ и е дел од програма за намалување на диспаритетите меѓу и во рамките на регионите и зголемување на регионалната конкурентност.

За оваа намена одобрени се средства во висина од 1.593.000 денари.

-Проектот „Модерен музеј – Европски град“ предвидува санација на фасадата од западната и источната страна на музејот и подобрување на енергетската ефикасност во музејот преку комплетирање на системот за централно греење и користење енергетски ефикасни суровини и обновливи извори на енергија. Со проектните активности ќе се заокружи процесот на реновирање и адаптација, а ќе се подобри и визуелниот впечаток на зградата на музејот како уредена, модерна и напредна установа која се грижи за културното наследство на регионот, лоцирана во европски град – Крива Паланка, информира службата за комуникација со јавност во Општина Крива Паланка.