Штипските советници од СДСМ нема да ги потпишат свечените изјави додека на нив стои Македонија без „Северна“

Штипските советници од СДСМ стојат на ставот дека свечената изјава, која вчера ја добиле од општинските служби не ја потпишуваат, оти не е валидна, а на која наместо уставното име Република Северна Македонија, стоеше Република Македонија. Координаторката на советничката група на СДСМ во Советот на Општина Штип, Маријана Рогожарска-Поповска, за МИА вели дека тие го почитуваат Уставот, а вчера тоа што се случи на седницата треба и некој да ги преземе одговорност.

– Ние ќе испратиме и барање за толкување до Општинската изборна комисија, Државната изборна комисија и до Собранието на Република Северна Македонија. Мнозинството предводено од ВМРО-ДПМНЕ плус Левица (крајна десница) постапи спротивно на Уставот и Статутот на општината. Истиот оној статут по која ја свикуваат и одржуваат седницата, вели Рогожарска-Поповска.

Деветмината штипски советници од СДСМ ќе чекаат да се корегира свечената изјава, па ќе ја дадат заклетвата на седница на Советот на општина Штип. МИА и вчера објави дека некорегираната изјава во Законот за локална самоуправа, која општинските служби само ја испечатиле, донесе тензии и расправии во Советот на Штип. На изјавата се уште стои Република Македонија, а не новото уставно име Република Северна Македонија.