Голем интерес за вакцинирање против сезонски грип во Струмица

Од почетокот на вакцинирањето против сезонскиот грип досега во Струмица се имунизирани околу 1.300 лица.

Од Центарот за јавно здравје во Струмица информираат дека во споредба со лани зголемен е бројот на граѓаните кои сакаат да се заштитат од грип. Најголем интерес има кај граѓаните на возраст над 65 години.

-Покрај оваа група граѓани, вакцина примаат и хронично болните, бремените жени, здравствените работници и децата од 6 месеци до 5 години, информира директорот Петре Витанов.

Според него, поголем дел од граѓаните кои се вакцинираат против грип, претходно примиле и вакцини против Ковид-19.

Вакцинирањето против грип се врши на четири пунктови, од кои едниот е во Валандово, кој го покрива Центарот за јавно здравје во Струмица.

Покрај интересот за бесплатното вакцинирање, голем интерес има и за комерцијалните вакцини за кои се плаќа 800 денари.