Продолжи изградбата на стариот струмички театар

По пауза од една година продолжи изградбата на стариот струмички театар, кој почна да се гради кон крајот на 2014 година. Заради ковид пандемијата изградбата беше целосно прекината. Зградата од надвор е целосно завршена, а останува да се уреди внатрешноста и да се постави опремата.

-Согласно одлуката за прекинување на одредени капитални инвестици паузиравме една година. Во овој период го решивме и проблемот со надзорот и сега него бесплатно ќе го извршува АД за изградба и стопанисување со станбен и деловен простор од значење за Републиката, информира Ацо Манински, директор на НУ „Завод и Музеј Струмица“.

Според него, сега се наметнуваат и други решенија околу завршувањето на изградбата, како што е поставување ново осветлување и застареност на одредени решенија кои ги имало во првичниот проект.

-Решенијата се планирани пред десетина година, а тогаш таа ставка на потрошувачка на електрична енергија била со една вредност, а сега е со друга. Новите технолошки решенија нудат можности за поквалитетна опрема и по други цени, додава директорот Манински.

Вели дека оптимален рок за предавање во употреба на стариот струмички театар е една година, а дотогаш треба да заврши и приклучувањето на гасоводната мрежа на Струмица за да се реши затоплувањето.

Инаку, стариот театар во осумдесеттите години на минатиот век беш напуштен поради дотраеност, а во два пожари потоа објектот целосно беше уништен и долго време беше грдотија во центарот на градот.

Во 1982 година била одиграна последната претстава во стариот театар. Ансамблот на НТ „Антон Панов“ буквално се селел како патувачки театар, а во 1986 година, кога беше отворен Домот на културата, струмичките актери добија привремен покрив над главата.