Петнаесеттиот Меѓународен семинар на албанологија се одржува на Универзитетот во Тетово

На Универзитетот во Тетово денеска започна Петнаесеттиот меѓународен семинар на албанологија. Во ректоратот беше одржано свечено отворање, по што учесниците од голем број образовни и научни установи се поделија во групи за работниот дел од семинарот.

– Оваа година семинарот се организира на посебен датум во нашата историја, токму на 113-годишнината од Конгресот во Битола и формирањето на азбуката на албанскиот јазик. Помина повеќе од еден век од Конгресот па ако видиме колку е напишано, објавено и реализирано во албанската литература не можеме а да не си дозволиме радост и задоволство, истакна во поздравниот говор Хазир Положани, проректор за наука при УТ.

На овогодинешниот семинар се претставуваат научните трудови кои учесниците ги одработиле согласно централната тема „Албанците и културата на спомените“.

– За ова теза веруваме дека ги поттикна истражувачите од оваа област да обработуваат теми од важна вредност и научна тежина. Семинарот по албанологија е продолжение и во служба на оваа цел со големи хумани и цивилизациски пораки. Исто така, одржувањето на семинарот е од големо значење не само за нашиот Универзитет, како високообразовно-научна институција и негов организатор, туку е значаен и за целата албанологија, рече проректорот Положани.

Во текот на денот учесниците ќе работат поделени во три научни сесии. Првата е посветена на трудовите со научно-историски предзнак како и етнокултура и медиуми, втората е посветена на албанската азбука и последната на албанскиот јазик.